ABŞ Prezidenti Donald Trampın xüsusi nümayəndəsi Stiv Uitkoff Qətərin paytaxtı Dohaya yola düşüb.
Çərşənbə axşamı Dohada ABŞ və İran arasında danışıqların keçirilməsi ehtimal edilir.
CNN telekanalı iki ABŞ rəsmisinə istinadən yayıb: “Uitkoff hazırda Dohaya yola düşür”.
ABŞ dövlət başçısının kürəkəni Cared Kuşnerin Uitkoffla birlikdə olub-olmaması hələ məlum deyil.
Qeyd edək ki, Tramp daha öncə çərşənbə axşamı Dohada ABŞ-İran görüşünün nəzərdə tutulduğunu bəyan etmişdi. Lakin İran Xarici İşlər Nazirliyinin sözçüsü İsmayıl Bəqai yaxın vaxtlarda Qətərdə heç bir təmas planlaşdırılmadığını bildirmişdi.
