Polşalı fotoqraf Stefan deyirdi: "Bu postlarda bizi yerə yıxır, başımıza silah dirəyib yoxlayırlar. Hər gün risk edirik. Bir gün biri tətiyə basıb bizi vuracaq."
2022-ci ilin mart ayının sonu idi. Kiyevdə nə ictimai nəqliyyat, nə taksi fəaliyyət göstərirdi. Rusiya ordusu paytaxtı mühasirəyə almışdı. Jurnalistlər avtomobil kirayələyirdi.
Həmin gün Nivki rayonundan mərkəzə piyada qayıdırdıq. 7-8 kilometrlik yolumuz var idi. Hər kilometrdə blokpostlar var idi. Şübhəli görünənləri sərt yoxlayırdılar.
Stefan haqlı idi. Postlara yaxınlaşanda əllərimizi yuxarı qaldırmaq qərarına gəldik. "Antonov" zavodu arxasındakı posta çatdıq. Birdən hərbçilər sıçrayıb qarşımızı kəsdi, yerə uzanmağımızı əmr etdi. Stefan bağırmağa başladı, ayağının altına güllə atdılar. Bir qadın onu vurmaq istədi, amma son anda dayandı. Yarım saat yoxlanışdan sonra bizi buraxdılar.
Bir ay sonra Ukrayna daxili işlər naziri Denis Monastriski ilə müsahibə etdim. O, geniş səlahiyyətə malik idi: polis, milli qvardiya, sərhəd xidməti, fövqəladə hallar. Müsahibədə müharibənin ilk günlərindəki xaosdan, prezidentə sui-qəsd cəhdlərindən danışdı.
Söhbət əsnasında dedi: "Şəxsən əmr vermişdim ki, şübhəli bilinən hər kəsi yerindəcə güllələsinlər." Mən blokpostlardakı təcrübəmi xatırladanda, o cavab verdi: "Bilirəm. Siz azərbaycanlılar diversantları asan tanıyırsınız. Amma biz necə edək? Hücum edənlər də pravoslav, biz də. O da İvan, mən də. O da sarışın, mən də.
O, prezidentə iki ayda 250-dən çox sui-qəsd cəhdi olduğunu, hakimiyyətdə satqınlar olduğunu söylədi. Bir ay sonra eyni tonda müsahibə verdi. Sonra ona qarşı iddialar səsləndi. Beş ay sonra isə helikopter qəzasında həlak oldu. Qəzanın səbəbi hələ də açıqlanmır.
