"Qiyamət günü" radiostansiyası kimi tanınan UVB-76, yeni bir mesaj yayımlayıb.
"UVB-76 Loqi" Telegram kanalının məlumatına görə, stansiya mayın 14-də Bakı vaxtı ilə saat 12:28-də efirə çıxıb.
Mesaj hərf və rəqəmlərdən ibarət olub, "superulduz" sözü də ilk dəfə səslənib: "NJTİ 68221 SUPERULDUZ 7006 3676".
UVB-76 daimi vızıltı səsi ilə tanınır və bəzən anlaşılmaz ifadələrlə müşayiət olunur. Stansiyanın Rusiya Silahlı Qüvvələrinə aid olduğu güman edilir.
Bir versiyaya görə, bu stansiya SSRİ dövründə hazırlanmış "Perimetr" (ABŞ-də "Ölü əl") sistemi ilə əlaqəlidir. Bu sistem nüvə cavab zərbəsini avtomatik idarə edir.
Digər nəzəriyyələrə görə, siqnallar astronomik müşahidələr və ya yerdənkənar həyatla əlaqə üçün istifadə olunur. Lakin heç bir nəzəriyyə təsdiqlənməyib.
Radiostansiyanın dəqiq yeri məlum deyil. Əvvəlcə Povarovo kəndi yaxınlığında yerləşdiyi, sonra Kerro kəndinə köçürüldüyü, indi isə Naro-Fominskdən fəaliyyət göstərdiyi ehtimal edilir.
