Venesuela prezidentinin səlahiyyətlərini icra edən Delsi Rodriges, iyunun 24-də baş verən dağıdıcı zəlzələlər nəticəsində həlak olanların xatirəsinə iyulun 1-dən 7-dək yeddi günlük milli matəm elan edib.
Rodriges X sosial şəbəkəsində verdiyi açıqlamada ölkənin dərin hüzn içində olduğunu bildirib. O, həlak olanların ailələrinə başsağlığı verib, yaralananlara tezliklə sağalmağı arzulayıb.
Zəlzələlər iyunun 24-də axşam saatlarında baş verib. Təxminən 40 saniyə fərqlə 7.2-7.5 maqnitudalı iki ardıcıl zəlzələ qeydə alınıb. Episentrlər Yarakuy ştatında bir-birindən 10 km aralıda yerləşib.
Son rəsmi məlumatlara görə, fəlakət nəticəsində 1 943 nəfər həlak olub, 10 571 nəfər yaralanıb. 28 380 zərərçəkənə xəstəxanalarda və çöl düşərgələrində tibbi yardım göstərilir.
