Bakıda keçirilən Ümumdünya Şəhərsalma Forumunun 13-cü sessiyasında (WUF13) 182 ölkədən 40 mindən çox insan qeydiyyatdan keçib.
Bu barədə "Haber Global" telekanalının canlı yayımında kanalın əməkdaşı Murat Karataş məlumat verib. O bildirib ki, WUF13 Qafqazda ilk dəfə Azərbaycanda keçirilir. 40 mindən çox iştirakçı bu günə qədər keçirilən forumlar arasında ən yüksək göstəricidir.
Karataş qeyd edib ki, 2024-cü ildə Misirin paytaxtı Qahirədə keçirilən WUF-da 24 min nəfər iştirak etmişdi. Forumun əsas mövzuları qlobal böhran, təhlükəsiz şəhərlər, iqlim dəyişikliyinə müqavimət, dayanıqlı şəhərsalma, ağıllı şəhərlər və fəlakətdən sonra yenidənqurmadır.
O, həmçinin vurğulayıb ki, 30 illik Ermənistan işğalından sonra Qarabağda tikinti prosesi başlayıb. Burada "ağıllı şəhər" və "ağıllı kənd" layihələri icra olunur. Yaşıl enerjiyə əsaslanan məskunlaşma planları beynəlxalq ictimaiyyətlə müzakirə ediləcək.
