İran rəhbərliyi, həlak olmuş ali lider Əli Xamenei ilə vida mərasimi günlərində yüngül cinayətlər törətmiş ən azı 850 məhbusun əfv edilməsi barədə göstəriş verib.
Oxu.Az "Tasnim" agentliyinə istinadən xəbər verir ki, bu barədə İranın Pul Kompensasiyalarının Ödənilməsi üzrə Xalq Qərargahının qəyyumlar şurasının sədri Seyid Əsədullah Culai açıqlama verib:
"Ehtiyatsızlıqdan törədilmiş cinayətlərə görə məhkum olunmuş 850 məhbusun azadlığa buraxılmasını dəstəkləmək məqsədilə bazar günü dövlət və ictimai qurumların nümayəndələrinin iştirakı ilə keçirilən xüsusi iclasda ölkənin bütün 31 əyalətindən daxil olan işlərə baxılıb. Nəticə etibarilə maliyyə öhdəliklərinə görə həbsdə olan 520 nəfərin, eləcə də nikah müqavilələri və aliment ödənişləri ilə bağlı işlər üzrə məhkum edilmiş 330 nəfərin azadlığa buraxılması barədə qərar qəbul edilib."
Əli Xamenei ilə vida mərasiminə iyulun 3-də Tehranda başlanılacaq. Matəm tədbirinə ən azı 30 ölkədən gələn yüksəksəviyyəli nümayəndə heyətləri qatılacaq. İyulun 4-dən 5-dək onun nəşi Tehranın Mosalla kompleksində saxlanılacaq. İyulun 6-da paytaxtın mərkəzi küçələrində matəm yürüşü keçiriləcək. Cənazə daha sonra Qum şəhərinə aparılacaq. Dəfn mərasimi iyulun 9-da Məşhəd şəhərində planlaşdırılıb.
