YouTube platformasında fəaliyyət göstərən Sin Çjiley adlı yutuber öz kanalının növbəti layihəsini təqdim edib: o, uydurma "Cat Town" (Pişik şəhəri) üçün tam funksional basketbol arenası tikib.
Oxu.Az xəbər verir ki, bu barədə dungen.ru yazıb.
Bu, artıq kanalın dördüncü böyük layihəsidir. Bundan əvvəl o, ev heyvanları üçün metro sistemi, supermarket və bilyard klubu kimi detallı mini-şəhər infrastrukturu yaratmışdı.
Yeni layihəyə görə, arena üç ay ərzində inşa edilib. Yutuber "Can a Cat Dunk a Basketball?" adlı videoda parket döşəmənin hər lövhəsini tək-tək yapışdırdığını, həmçinin 3 000-dən çox oturacaq hazırladığını qeyd edib. Tribunaların hazırlanması bir aydan çox vaxt aparıb. Arenada hətta temperaturu tənzimləmək üçün kondisioner də quraşdırılıb.
Eyni vaxtda "Cat Town" layihəsinə "Meow-riott" adlı hotel də əlavə olunub. Hoteldə resepşn, lift və tam təchiz olunmuş otaqlar var, hətta vanna otağından baxış üçün pəncərələr və avtomatik tündləşdirilən şüşələr də quraşdırılıb.
"Cat Town" layihəsi artıq iki ildir inkişaf etdirilir və kiçik ev heyvanı modellərindən başlayaraq indi tam şəhər səviyyəsinə çatıb.
