Türkmənistanda keçirilən Azərbaycan Mədəniyyəti Günləri çərçivəsində iyunun 6-da Arkadağ Şəhər Tarix və Diyarşünaslıq Muzeyində “Azərbaycan – obyektivdən tarixə” adlı sərgi açılıb.
Oxu.Az-ın məlumatına görə, tədbirdə Azərbaycan mədəniyyət nazirinin müavini Murad Hüseynov, Türkmənistan mədəniyyət nazirinin müavini Nursəhet Şirimov, Milli Məclisin deputatı Hikmət Məmmədov, Azərbaycan Yazıçılar Birliyinin katibi İlqar Fəhmi, həmçinin mədəniyyət, ədəbiyyat və elm xadimləri iştirak ediblər.
Murad Hüseynov çıxışında Türkmənistanda Azərbaycan mədəniyyətinin yüksək səviyyədə təqdim olunduğunu vurğulayıb. O, mədəniyyət günlərinin həm Aşqabadda, həm də Arkadağda keçirilməsini əlamətdar hadisə kimi qiymətləndirib.
Türkmənistan mədəniyyət nazirinin müavini Nursəhet Şirimov iki xalq arasında mədəni əlaqələrin inkişafından və qarşılıqlı mədəniyyət günlərinin əlaqələri möhkəmləndirməsindən danışıb.
Azərbaycan Fotoqraflar Birliyinin sədri Amira Süleyman bildirib ki, sərgidə nümayiş olunan fotolarda ölkəmizin müasir memarlığı, azad olunmuş ərazilərimizdəki tarixi-mədəni irs və bərpa-quruculuq işləri əks olunub.
Sonda qonaqlar sərgi ilə tanış olublar.
