Bu gün Heydər Əliyev Sarayında Azərbaycan Dövlət Akademik Opera və Balet Teatrının təqdimatında dahi bəstəkar Üzeyir Hacıbəyovun "Koroğlu" operası növbəti dəfə səhnələşdirilib.
Tamaşanın dirijoru Əməkdar artist Əyyub Quliyev, quruluşçu rejissoru Əməkdar incəsənət xadimi Hafiz Quliyevdir. Quruluşçu rəssamlar SSRİ Xalq rəssamı Tahir Salahov və Əməkdar mədəniyyət işçisi Tehran Babayev, baletmeyster SSRİ Xalq artisti Qəmər Almaszadə, xormeyster Əməkdar incəsənət xadimi Sevil Hacıyevadır.
Koroğlu (Rövşən) obrazını Xalq artisti Yusif Eyvazov, Nigar obrazını Əməkdar artist Afaq Abbasova canlandırıb. Yusif Eyvazov bildirib: "Koroğlu çox mürəkkəb roldur. İkinci dəfədir səhnəyə çıxıram, amma 30 dəfədən sonra özümü bu obrazda hiss edəcəm. Xarici səhnələrlə müqayisədə Vətəndə çıxış daha böyük məsuliyyətdir."
Afaq Abbasova isə qeyd edib: "Dahi Üzeyir bəyin şah əsəri "Koroğlu"da Nigar obrazı ilə səhnəyə çıxmaq böyük xoşbəxtlikdir. Aylarla davam edən məşqlərimizin nəticəsidir."
Tamaşada Həsən xan rolunu Mahir Tağızadə ilk dəfə, Ehsan paşa obrazında Fəhmin Əhmədli, İbrahim xan rolunda Nazim Mahmudov, Həmzə bəy obrazında Tural Ağasıyev, Alı rolunda Əkrəm Poladov, Təlxək obrazında Əliəhməd İbrahimov, Polad rolunda Mirəli Sarızadə (ilk dəfə), Eyvaz obrazında Nəzər Bəylərov, Xanəndə qız rolunda Nəzakət Teymurova, əyan rollarında Məhəmməd Şəmmədov və Cavidan İsayev (ilk ifa) çıxış edib. Carçı rolunu da Əliəhməd İbrahimov ifa edib.
