Bu gün Xalq artisti Ofeliya Sənənin doğum günüdür.
Ofeliya Hacağa qızı Sənəni 1941-ci il mayın 26-da Bakıda anadan olub. Məktəb illərindən sənətə maraq göstərən Ofeliya xanım 1959-cu ildə Respublika Radiosunda təcrübəçi diktor kimi fəaliyyətə başlayıb. Daha sonra Bakı Dövlət Universitetinin filologiya fakültəsində təhsil alıb.
1959-1975-ci illərdə radio tamaşalarında baş rolları səsləndirən Ofeliya Sənəni dinləyicilərin rəğbətini qazanıb. Güclü diksiya və emosional təqdimat onu efirin seçilən simalarından edib. 1975-ci ildən Azərbaycan Televiziyasında diktor kimi çalışıb, 1978-ci ildə ali dərəcəli diktor adına layiq görülüb.
Ofeliya Sənəni uzun illər "Azərbaycanfilm" kinostudiyasının dublyaj şöbəsində çalışıb. 1960-1990-cı illərdə 100-dən artıq filmdə baş qəhrəmanları səsləndirib. "Yeddi oğul istərəm" filmində Humay, "Gün keçdi" filmində Əsmər, "Tütək səsi"ndə İsmət, "Qaynana" filmində Sevda obrazları yaddaşlara həkk olunub.
Aktrisa kimi "Dağlarda döyüş", "Sahil bağı", "O qızı tapın", "Ulduzlar sönmür", "Mücrü" və "Bakı bulvarı" filmlərində çıxış edib. Diktor məktəbinin aparıcı nümayəndələrindən olan Ofeliya Sənəni yeni nəslin yetişməsində rol oynayıb. Davud Əhmədovla "Səhər görüşləri" proqramı və uşaqlar üçün "Biləyən" proqramı ilə tanınıb.
1975-ci ildə "Əməkdar artist", 1991-ci ildə "Xalq artisti" fəxri adına layiq görülüb. 1994-cü ildə Prezident tərəfindən fərdi təqaüd verilib.
