Cari ilin hazırlıq planına əsasən, Hərbi Dəniz Qüvvələri (HDQ) tərəfindən Hərbi Hava Qüvvələri (HHQ), Dövlət Sərhəd Xidmətinin Sahil Mühafizəsi (DSXSM) və Fövqəladə Hallar Nazirliyinin (FHN) iştirakı ilə genişmiqyaslı təlim keçirilib.
“Dənizdə və sahilyanı ərazilərdə kritik enerji infrastrukturuna təhdidlər zamanı müdafiə əməliyyatlarının aparılması” mövzusunda olan döyüş atışlı taktiki təlim bir neçə mərhələdə icra edilib.
Təlimdə HDQ-nin döyüş, döyüş təminatı və təminat gəmiləri, eləcə də Dəniz xüsusi təyinatlı və Dəniz piyada bölmələri iştirak edib.
Məqsəd komandir heyətinin ekstremal şəraitdə operativ qərar qəbuletmə bacarıqlarını təkmilləşdirmək, gəmilərin fərdi və taktiki qrup tərkibində döyüş tapşırıqlarına hazırlığını yoxlamaq olub.
“Həyəcan” siqnalı ilə qaldırılan bölmələr tam döyüş hazırlığına gətirilərək əməliyyat rayonlarına çıxarılıb.
Döyüş atışlı təlimdə patrulaparma, təxribat və hücum cəhdlərinin qarşısının alınması, hava, suüstü və sualtı vasitələrin məhv edilməsi kimi tapşırıqlar uğurla yerinə yetirilib.
Sonrakı mərhələdə dəniz xüsusi təyinatlıları, HDQ və DSXSM gəmiləri ilə birgə kritik infrastrukturun mühafizəsini təmin edib, şərti düşmənin diversiya qruplarını zərərsizləşdirib.
Helikopter dəstəyi ilə terrorçu qrupların bazalarına eniş edilərək gizlənmiş silahlılar məhv edilib.
Gəmi Əməliyyatları Qrupları ələ keçirilmiş gəminin azad edilməsi və girovların xilası üzrə əməliyyat icra edib.
Dəniz piyadaları terrorçuların ələ keçirdiyi yaşayış məntəqəsində girovları azad edib.
Yanğının söndürülməsi, yaralıların xilası və minaların zərərsizləşdirilməsi FHN və HDQ Axtarış Xilasetmə Xidməti tərəfindən həyata keçirilib.
İti sürətli katerlər ağır yaralıları tibbi gəmiyə təxliyə edib.
Təlimin sonunda gəmi, kater və yeni silahlı insansız dəniz vasitələrinin nümunəvi keçidi təşkil edilib.
Təlimdə əsas diqqət Xəzərdə kritik enerji infrastrukturunun mühafizəsi və qarşılıqlı fəaliyyətin təkmilləşdirilməsinə yönəldilib.
