İspaniyalı kardioloq Aurelio Roxas, elmi araşdırmalara əsaslanaraq, ürək sağlamlığı üçün ən faydalı yay giləmeyvəsinin çiyələk olduğunu açıqlayıb.
Həkimin sözlərinə görə, çiyələk tərkibindəki yüksək antioksidant və lif sayəsində xroniki iltihabla mübarizədə mühüm rol oynayır. Bu iltihab şəkərli diabet, piylənmə və xroniki yorğunluq kimi xəstəliklərin əsas səbəblərindəndir.
Mütəmadi çiyələk istehlakı insulin həssaslığını artırır və qan şəkərini normallaşdırır.
Kardioloq vurğulayır: "Qanda qlükozanın kəskin yüksəlməsi iltihabi prosesləri artırır, damar və hüceyrə yaşlanmasını sürətləndirir, ürək-damar xəstəlikləri riskini yüksəldir."
Çiyələk həmçinin toxluq hissini artırır, oksidləşdirici stresi azaldır və ürəyi qorumaq istəyənlər üçün yay aylarında ideal qida seçimidir.
