Girdimançayın İsmayıllıdan keçən hissəsində selə düşən 3 nəfər xilas edilib. Hüseynov Gümşüd Mərdan oğlu, Rüstəmov Ehtiram Sadıq oğlu (1968) və Əzimov Simran Eynulla oğlu (1985) adlı şəxslər xilasetmə əməliyyatı nəticəsində sağ qurtarılıblar.
Rayonun Zərnava kəndindən yas mərasimindən qayıdan üç nəfər 'Niva' markalı avtomobillə Girdimançayı keçmək istəyərkən sel səbəbindən çayın ortasında köməksiz vəziyyətdə qalıb. Hadisə gecə saat 01:57-də İsmayıllı Rayon Dövlət Yanğından Mühafizə Hissəsinə və FHN-in 101 Çağrı Xidmətinə bildirilib.
Fövqəladə Hallar Nazirliyinin 10 nəfərdən ibarət xilasedici qrupu hadisə yerinə cəlb edilib. Xilasedicilər ağır texnika və xüsusi avadanlıqlardan istifadə edərək Girdiman çayında köməksiz qalan şəxsləri xilas ediblər.
