Bakı Ağır Cinayətlər Məhkəməsində "Respublika Perinatal Mərkəzi"ndə 7 körpənin öldüyü yanğınla bağlı hökm oxunub.
Hakim Leyla Əsgərova-Məmmədovanın sədrliyi ilə keçirilən son iclasda təqsirləndirilənlər son söz deyib, ardınca hökm elan edilib.
Məhkəmə qərarına əsasən, keçmiş direktor Mehriban Abbasquliyeva 7 il 3 ay, Hamlet Mustafayev 5 il 8 ay, Elnur Əhmədli isə 5 il 2 ay müddətinə azadlıqdan məhrum edilib.
Təqsirləndirilənlər barəsindəki nəzarət tədbiri həbslə əvəz olunub və onlar məhkəmə zalında həbs edilib.
Prokuror Mehriban Abbasquliyevanın 8 il, Hamlet Mustafayev və Elnur Əhmədlinin isə 7 il müddətinə azadlıqdan məhrum edilməsini tələb etmişdi.
Xatırladaq ki, 2024-cü il yanvarın 9-da Mərkəzin 4-cü mərtəbəsində baş verən yanğında 7 yenidoğulmuş həyatını itirib, 4 nəfər xəsarət alıb, 361 min manat ziyan dəyib.
İstintaq müəyyən edib ki, Abbasquliyeva vəzifə səlahiyyətlərindən sui-istifadə edərək xəstə qəbulunu artırıb, nəticədə elektrik şəbəkəsi yüklənərək yanğına səbəb olub.
Həmçinin, FHN tərəfindən yanğın təhlükəsizliyi ilə bağlı çatışmazlıqlar aşkarlansa da, rəhbərlik tərəfindən aradan qaldırılmayıb.
Zərərçəkmiş qismində Mərkəz, Elçin Nəcəfov, Vaqif Hacıyev, Aynurə Əhmədova və Gülbahar Zülfüqarova tanınıb.
