Azərbaycanın idman gimnastları Bakıda keçirilən "AGF Trophy" beynəlxalq turnirini 16 medalla başa vurublar.
Bu barədə Azərbaycan Gimnastika Federasiyası məlumat yayıb. İdmançılar gənclər və böyüklər kateqoriyasında çıxış ediblər.
Qadınlardan Nazənin Teymurova, Dəniz Əliyeva, Aytən Məmmədova, Xədicə Abbaszadə, gənclərdən Albina Əliyeva, Leyla Məmmədzadə, Aynaz Məcidzadə, Lalə Zamanlı, kişilərdən Rəsul Əhmədzadə, Aydın Əlizadə, Nikita Simonov, gənclərdən Miryusif Əhmədzadə, İlham Salayev, Mahir Səlimov, İsgəndər Cavadzadə, Məhəmməd Rüstəmzadə ölkəmizi təmsil ediblər.
İlk gün gənclər komanda hesabında və çoxnövçülükdə mükafatlandırılıb. Həm qadın, həm kişi komandamız bürünc qazanıb. Fərdi çoxnövçülükdə Leyla Məmmədzadə bürünc medal alıb.
İkinci gün böyüklər çoxnövçülükdə çıxış edib. Kişilərdə Rəsul Əhmədzadə qızıl, qadınlarda Xədicə Abbaszadə bürünc qazanıb.
Final mərhələsində alətlər üzrə yarışlar olub. İlham Salayev sərbəst hərəkətlərdə bürünc, Leyla Məmmədzadə dayaqlı tullanma, müxtəlif hündürlüklü qollar və sərbəst hərəkətlərdə üç bürünc qazanıb.
Böyüklərdə Rəsul Əhmədzadə at və turnikdə qızıl, Dəniz Əliyeva tullanmada qızıl, müxtəlif hündürlüklü qollarda gümüş, Nikita Simonov halqalarda qızıl, Nazənin Teymurova tirdə qızıl, Aydın Əlizadə paralel qollarda bürünc qazanıb.
Qeyd: Mayın 14-16-da Milli Gimnastika Arenasında 5 ölkədən 50-yə yaxın gimnast iştirak edib.
