FIFA İntizam Komitəsi ABŞ hücumçusu Folarin Baloqun qırmızı kart cəzasını şərti dayandırıb. O, Belçikaya qarşı 1/8 finalda oynaya biləcək.
“The Athletic”in məlumatına görə, Baloq Bosniya və Herseqovina ilə görüşdə rəqib müdafiəçiyə kobud müdaxilə etdiyi üçün qırmızı vərəqə almışdı. Qaydalara əsasən, o, növbəti oyunu buraxmalı idi.
FIFA İntizam Məcəlləsinin 27-ci maddəsinə əsasən, bir oyunluq diskvalifikasiya bir illik sınaq müddəti ilə əvəz edilib. Əgər Baloq bu müddətdə eyni ağırlıqda qayda pozarsa, cəza qüvvəyə minəcək.
2025-ci ildə Kriştianu Ronaldu da oxşar vəziyyətdə şərti cəza almışdı. O, seçmə mərhələdə dirsəklə zərbə endirdiyi üçün qırmızı kart görmüş, lakin iki oyunluq şərti cəza ilə uzunmüddətli diskvalifikasiyadan yayınmışdı.
25 yaşlı Baloq “Monako”da çıxış edir. DÇ-2026-da 3 qol vuraraq ABŞ-ın ən məhsuldar oyunçusudur.
ABŞ-Belçika oyunu iyulun 7-nə keçən gecə keçiriləcək. Qalib İspaniya-Portuqaliya qarşılaşmasının qalibi ilə oynayacaq.
