"Sabah" klubunun litvalı baş məşqçisi Valdas Dambrauskas Azərbaycanda "qızıl dubl"a imza atan ilk əcnəbi mütəxəssis kimi tarixə düşüb.
Masazır təmsilçisi Misli Premyer Liqasında çempionluğu mövsümün bitməsinə iki həftə qalmış təmin edib. Sonra isə Azərbaycan Kubokunun finalında "Zirə"ni 2:1 hesabı ilə məğlub edərək kuboku da başı üzərinə qaldırıb.
"Sabah" öz tarixində ilk dəfə "qızıl dubl" sevincini yaşadı. Klub, eyni mövsümdə həm çempionluğu, həm də kuboku qazanan 5-ci komanda oldu.
Ötən mövsümlərdə cəmi 4 klub tərəfindən 11 dəfə "qızıl dubl" əldə edilib. Bu göstəricidə mütləq lider "Qarabağ"dır - 6 dəfə (1993, 2014/2015, 2015/2016, 2016/2017, 2021/2022, 2023/2024). "Neftçi" 3 dəfə (1995/1996, 2003/2004, 2012/2013) bu uğura imza atıb. "Kəpəz" (1997/1998) və "Xəzər Lənkəran" (2006/2007) isə bir dəfə fəth ediblər.
Dambrauskasdan əvvəl bütün "qızıl dubl"lar yerli məşqçilərə məxsus idi. Rekordçu Qurban Qurbanov 5 dəfə (2014/2015, 2015/2016, 2016/2017, 2021/2022, 2023/2024). Kazbek Tuayev (1995/1996, 2003/2004) və Ağasəlim Mircavadov (1993, 2006/2007) iki dəfə, Mehman Allahverdiyev (1997/1998) və Böyükağa Hacıyev (2012/2013) bir dəfə bu tarixi nəticəyə çatıblar.
