İngiltərə milli komandasının sabiq kapitanı Devid Bekhem Böyük Britaniya tarixində milyarder statusuna çatan ilk idmançı olub.
Oxu.Az xəbər verir ki, bu barədə nüfuzlu "The Times" nəşri məlumat yayıb.
51 yaşlı idmançı və onun həyat yoldaşı - müğənni və dizayner Viktoriya Bekhemin birgə sərvəti hazırda 1.185 milyard funt sterlinq dəyərində qiymətləndirilir. Qeyd olunur ki, məşhur cütlüyün maliyyə vəziyyəti təkcə son bir il ərzində iki dəfədən çox yaxşılaşıb.
"The Times" nəşrinin təhlilinə görə, bu kəskin artım, əsasən, Bekhemin 2018-ci ildən ortaq sahibi olduğu MLS təmsilçisi "İnter Mayami" klubuna etdiyi sərmayə ilə bağlıdır. Hazırda səkkizqat "Qızıl top" sahibi Lionel Messinin də çıxış etdiyi komandada Bekhemin payının dəyəri təxminən 300 milyon funt sterlinqə çatır.
Xatırladaq ki, "Forbes" jurnalının son milyarderlər siyahısında idmançılardan Maykl Cordan (4.3 milyard dollar), Mecik Conson (1.6 milyard dollar), Lebron Ceyms (1.4 milyard dollar), Tayqer Vuds (1.5 milyard dollar) və Rocer Federer (1.1 milyard dollar) yer alıblar.
Peşəkar karyerasını 2013-cü ildə başa vuran Bekhem "Mançester Yunayted", "Real", PSJ, "Milan" və "Los-Anceles Qelaksi" kimi nəhəng klubların formasını geyinib. O, İngiltərə, İspaniya və Fransa çempionatlarının, eləcə də Çempionlar Liqasının qalibi adlarını qazanıb.
Ulduz futbolçu İngiltərə yığmasının heyətində 115 matça çıxıb və altı il ərzində milli komandanın kapitan sarğısını daşıyıb.
