Azərbaycan millisinin qapıçısı Emil Balayev uzun fasilədən sonra yığmaya qayıtdığı üçün sevincini bildirib.
Oxu.Az "Report"a istinadən xəbər verir ki, qolkiper Malta ilə yoldaşlıq matçı öncəsi mətbuat konfransında danışıb.
Avstriyadakı təlim-məşq toplanışı və komanda atmosferi haqqında danışan Balayev deyib:
"Baş məşqçi Ayxan Abbasov başda olmaqla, bütün məşqçilərə təşəkkür edirəm. Zədələr səbəbindən uzun müddət oyunlardan uzaq qalsam da, 3 ildən sonra yenidən yığmada olmaq məni çox sevindirir. Komandada əsl ailə atmosferi var. Sabahkı oyunun maraqlı keçəcəyini düşünürəm."
Qeyd edək ki, Azərbaycan - Malta yoldaşlıq oyunu iyunun 5-də Avstriyada baş tutacaq.
