Misli Premyer Liqasının 32-ci turu 'Kəpəz'in futbolçusu Ehtiram Şahverdiyev və 'Sabah'ın yarımmüdafiəçisi Aleksey İsayev üçün əlamətdar oldu.
Oxu.Az xəbər verir ki, onlar Premyer liqada 200-cü oyunlarını keçiriblər.
Ehtiram Şahverdiyev üçün yubiley 'Araz-Naxçıvan'la səfər görüşünə (2:0) təsadüf edib. O, bu qarşılaşmalarda 6 qol vurub. Premyer Liqada 2015/16 mövsümündə 'Qəbələ' forması ilə debüt edən Şahverdiyev dörd klubda çıxış edib.
Ehtiram 'Kəpəz'də daha çox - 96 matça (üç qol) çıxıb. O, 'Sumqayıt'da 43 (bir qol), 'Qəbələ'də 35 (bir qol), 'Turan Tovuz'da 26 (bir qol) dəfə meydana çıxıb.
Aleksey İsayev isə 200-cü oyuna 'Neftçi' ilə ev matçına (1:2) start heyətində çıxıb. Debütü 2018/19 mövsümündə 'Sumqayıt' forması ilə gerçəkləşən Aleksey yubiley matçında qol sevinci də yaşayıb. Bu, yarımmüdafiəçinin 15-ci qolu olub.
O, Premyer Liqada üç klubun formasını geyinib. İsayev 'Sabah'da 118 (14 qol), 'Qarabağ'da 44 (bir qol), 'Sumqayıt'da 38 dəfə şans qazanıb.
