Meksikada qadın futbolçu İzabel Akosta Ernandes müəmmalı şəraitdə dünyasını dəyişib.
Oxu.Az xəbər verir ki, bu barədə "Need To Know" məlumat yayıb.
Sinaloa ştatının Masatlan şəhərində yaşayan 19 yaşlı idmançı iyunun 9-da öz evində huşsuz vəziyyətdə aşkarlanıb. Çağırış üzrə gələn tibb işçiləri qızın həyatını xilas edə bilməyiblər. Hüquq-mühafizə orqanları meyitdə hər hansı zorakılıq və ya boğulma izinə rast gəlməyiblər.
Müstəntiqlər onun qaldığı ərazini nəzarətə götürsələr də, hadisə ilə bağlı saxlanılanlar barədə məlumat yoxdur.
Qapıçı mövqeyində çıxış edən Ernandes bir müddət əvvəl ölkə çempionatının üçüncü divizyonunda mübarizə aparan "Obson Dinamo" komandasına transfer olunub.
Qadın futbolçunun ölümü ilə bağlı dəqiq səbəblər hələ də naməlum olaraq qalır.
"Need To Know" qeyd edir ki, hazırda Sinaloa ştatının rəhbərliyi ərazidə cinayətkar qruplaşmaların fəallaşması səbəbindən təhlükəsizlik tədbirlərini artırıb. Lakin futbolçunun ölümünün kriminal hadisələrlə əlaqədar olmadığı bildirilir.
