Futbol dünyası növbəti böyük bayrama hazırlaşır. Planetin ən populyar idman növünün zirvə yarışı olan dünya çempionatı tarixdə ilk dəfə üç ölkənin - ABŞ, Kanada və Meksikanın birgə ev sahibliyi ilə keçiriləcək. Turnir həm təşkilatçılıq, həm format, həm iştirakçı sayı, həm də gözləntilər baxımından fərqlənir. Azarkeşləri bir aydan artıq davam edəcək möhtəşəm tamaşa gözləyir.
1930-cu ildə Uruqvayda keçirilən ilk dünya çempionatında cəmi 13 komanda iştirak etmişdi. 96 il sonra bu rəqəm 48-ə yüksəlir. FIFA-nın qərarına əsasən, mundialda 12 qrup olacaq və ümumilikdə 104 oyun keçiriləcək. Bu, əvvəlki turnirlərlə müqayisədə 40 əlavə matç deməkdir. Turnirin müddəti də uzanıb və futbol bayramı bir aydan artıq davam edəcək.
FIFA bu addımı futbolun qloballaşması ilə əsaslandırır. Daha çox ölkə mundial həyəcanını yaşayacaq, yeni bazarlar yaranacaq, futbolun inkişafı sürətlənəcək. Yeni format xüsusilə Afrika, Asiya və Şimali Amerika təmsilçilərinin sayının artmasına səbəb olub. Özbəkistan, Kurasau kimi ölkələr ilk dəfə mundial atmosferini hiss edəcək. Tənqidçilər isə hesab edirlər ki, iştirakçı sayının artırılması bəzi oyunların keyfiyyətinə mənfi təsir göstərə bilər. Yeni formatın uğurlu olub-olmadığını yalnız turnir başa çatdıqdan sonra qiymətləndirmək mümkün olacaq.
ABŞ, Kanada və Meksika tarixdə ilk dəfə birlikdə dünya çempionatına ev sahibliyi edəcəklər. Turnir 16 şəhərdə keçiriləcək. Açılış oyunu əfsanəvi "Azteka" stadionunda baş tutacaq, final isə Nyu-Cersi ştatındakı "MetLife"da keçiriləcək. Turnir tarixdə ən böyük logistika sınaqlarından biri olacaq. Şəhərlər arasındakı məsafələr min kilometrlərlə ölçülür. Vankuverlə Mayami arasında təqribən 4500 kilometr məsafə var. FIFA qrupları regional prinsiplə formalaşdırmağa çalışıb ki, iştirakçılar az səyahət etsinlər. Uzun uçuşlar, fərqli saat qurşaqları və müxtəlif iqlim şəraiti nəticələrə təsir edə biləcək amillərdir.
Bu mundial həm də Şimali Amerika futbolunun inkişaf səviyyəsinin göstəricisi olacaq. ABŞ son illərdə futbola böyük investisiyalar yatırıb. Lionel Messi və digər ulduzların MLS-ə gəlişi liqaya marağı artırıb. Meksika üçün turnir xüsusi əhəmiyyət daşıyır - ölkə üçüncü dəfə dünya çempionatına ev sahibliyi edərək rekord qıracaq. Kanada isə ilk dəfə belə böyük futbol hadisəsinin mərkəzinə çevriləcək.
2022-ci ildə Qətərdə Argentina dünya çempionu oldu. Lionel Messi, nəhayət, çatışmayan kuboku qazandı. İndi argentinalılar uğurun təsadüfi olmadığını göstərməyə çalışacaqlar. Sonuncu dəfə titulunu qoruyan komanda 1962-ci ildə Braziliya olub. Messi karyerasında 6-cı mundialında iştirak edəcək. O artıq 4 il öncəki deyil, lakin Argentina komandası tamamilə ondan asılı görünmür. Kollektiv son illərdə sabit və xarakterli oyun nümayiş etdirir. Argentina yenidən final uğrunda mübarizə aparacaq gözlənilir.
Son dörd dünya çempionatının üçündə kubok Avropaya gedib. Fransa, İspaniya, İngiltərə və Portuqaliya əsas favoritlərdir. Fransa ən zəngin heyətlərdən birinə malikdir, Kilian Mbappe komandanın lideridir. İngiltərə illərdir gözlənilən uğuru əldə etməyə çalışır. Son Avropa çempionu İspaniya yeni nəsillə qayıtmaq arzusundadır. Portuqaliyada Kriştiano Ronaldo karyerasında 6-cı mundialını keçirəcək. Portuqaliyanın güclü heyəti Ronaldonun arzusuna çatması üçün imkan yaradır.
Braziliya sonuncu dəfə 2002-ci ildə dünya çempionu olub. Bu dəfə ümidlər baş məşqçi Karlo Ançelottiyə bağlanıb. Vinisius Junior, Endrik, Rafinya kimi futbolçular ümid verir. Neymarın mundialdakı son çıxışı da maraqlı olacaq. Türkiyə 24 il sonra mundialda iştirak edəcək. Arda Güler, Kenan Yıldız, Orkun Kökçü kimi gənc istedadlar ümid yaradıb. Türkiyə 2002-ci ildə əldə olunan tarixi üçüncülükdən sonra ən iddialı kollektivlərdən biridir. Azərbaycanlı azarkeşlər üçün qardaş ölkənin iştirakı marağı artırır.
İyunun 11-dən iyulun 19-dək milyonlarla insanın gündəlik həyatı futbolun ritmi ilə döyünəcək. Sevinc, göz yaşı, qəhrəmanlıq və məyusluq eyni səhnədə yer alacaq. Çünki dünya çempionatı sadəcə futbol turniri deyil - bu, futbolun özüdür.
