Azərbaycanlı UFC döyüşçüsü Nazim Sadıxov Bakıya qayıdıb. O, iyunun 27-də keçiriləcək "UFC Fight Night: Fiziev vs Torres" turnirində braziliyalı Mateus Kamilo ilə qarşılaşacaq.
Heydər Əliyev Beynəlxalq Aeroportunda idmançını azarkeşlər və yaxınları qarşılayıb. Sadıxov Bakıya qayıtmaqdan məmnun olduğunu bildirib: "Yenidən Bakıda olmaqdan çox xoşbəxtəm və növbəti dəfə tarix yazmağa hazıram."
"Qara canavar" ləqəbli döyüşçü 2025-ci ildəki uğurlu çıxışını xatırladaraq, bu dəfə hədəflərinin daha yüksək olduğunu vurğulayıb: "Ötən il mənim üçün çox uğurlu keçdi. Lakin bu dəfə daha yaxşı çıxış etmək, hər şeyi daha möhtəşəm etmək istəyirəm."
Turnirdə Rafael Fiziyev Manuel Torres, Şarabutdin Maqomedov Mişel Pereyra, Fərman Həsənov isə Erik Nolan ilə döyüşəcək. Biletlər iTicket saytında mövcuddur.
