Azərbaycan Minifutbol Federasiyasının prezidenti Orxan Məmmədov bildirib ki, milli komandanın ikinci dəfə Avropa çempionu olması ölkə idmanı və futbolu üçün böyük hadisədir.
Oxu.Az xəbər verir ki, bu barədə o, "Report"a açıqlamasında deyib.
AMF rəhbəri komandanın Slovakiyada keçirilən turnirdə birinci yeri tutması ilə bağlı fikirlərini bölüşüb:
"Hamını qələbə münasibəti ilə təbrik edirəm. Tarixi qələbədir. Azarkeşlər bizə möhtəşəm dəstək olurdular. Hər birinə təşəkkürlərimi çatdırıram. Yenidən Avropa çempionu olmaq böyük qürurdur".
O, komandanın 2022-ci ildə də qızıl medal qazandığını, ötən il Bakıda dünya çempionu olduğunu xatırladıb:
"Artıq komandalar bizi başqa cür qəbul edirdilər. Bütün futbolçulara, məşqçilər heyətinə təşəkkür edirəm. İkinci dəfə Avropa çempionu olmaq böyük qürurdur".
O, Prezident İlham Əliyevin dünya çempionluğundan sonra onları qəbul edərək növbəti uğuru təkrarlamağı tapşırdığını xatırladıb:
"Həmin sözlərdən sonra yenidən çempion olduğumuz üçün qürurluyuq. Dövlətimiz hər cür dəstək göstərir".
AMF prezidenti 4 il ərzində 2 Avropa, 1 dünya çempionluğu əldə etmələrinin səbəbini baş məşqçi Elşad Quliyevin zəhməti ilə əlaqələndirib.
Qeyd edək ki, Azərbaycan millisi Avropa çempionatının final matçında Ukraynanı 2:0 hesabı ilə məğlub edib.
