Yeni mövsümdən Azərbaycan Premyer Liqasında mübarizə aparacaq "Şəfa" futbol klubu, Avropa Futbol Klubları (EFC) təşkilatına üzv qəbul olunub.
Clubun mətbuat xidmətindən verilən məlumata görə, EFC rəhbərliyi tərəfindən kluba rəsmi məktub ünvanlanıb. Sənəddə "Şəfa"nın qitənin 800-dən çox komandasını birləşdirən nüfuzlu futbol icmasının bir hissəsinə çevrildiyi vurğulanıb.
EFC nümayəndələri qurumun əsas missiyasını Avropa futbol elitasını tək çətir altında birləşdirmək, maraqlarını qorumaq və inkişafı dəstəkləmək kimi açıqlayıb. Təşkilat üzv klublara qitə futbolunun gələcəyində söz sahibi olmaq imkanı yaradır.
"Şəfa"nın bu mötəbər quruma qoşulması, klubun Avropa futbolunun ortaq gələcəyinə sadiqliyini göstərir. EFC rəhbərliyi əməkdaşlıqdan məmnun olduğunu bildirib.
