Şəki PFK-da gözlənilməz hadisə baş verib. Komandanın 5 üzvü son oyuna çıxmaqdan imtina edib.
Klub rəhbərliyi məsələ ilə bağlı rəsmi bəyanat yayıb. Qeyd olunub ki, ikinci liqanın son turunda bir neçə futbolçu meydana çıxmaqdan imtina edib.
Bəyanatda vurğulanıb ki, həmin futbolçular ikinci dövrədəki bütün oyunların və may ayına qədər olan ayların maaşlarını tam alıblar. May ayında cəmi iki oyun keçirilib və heç bir rəsmi maaş gecikməsi olmayıb.
Futbolçular əsassız iddialarla çıxış ediblər: "son oyundur, ödəniş edilməyə bilər, əvvəlcədən ödəniş edilsin". Bu səbəbdən oyuna çıxmaqdan imtina ediblər.
Oyunda iştirak etməyən futbolçular: Rəsul İbrahimov, Zaur Fərzəliyev, Çərkəz Hüseynov, Mehdi Həşumov, Nazim Bağırov.
Araşdırma zamanı məlum olub ki, kapitan Rəsul İbrahimov digər futbolçularla əlaqə saxlayaraq onları oyuna çıxmamağa çağırıb.
Nəticədə Şəki PFK XXVII turda "Ağstafa Gəncləri"nə qarşı oyuna cəmi doqquz futbolçu ilə çıxıb.
Klub rəhbərliyi bu davranışı peşəkar futbol prinsiplərinə və daxili intizam qaydalarına zidd qiymətləndirib. Hüquqi addımlar atılacağı bildirilib və futbolçular əvvəlcədən xəbərdar ediliblər.
