2025/2026 mövsümünü Premyer Liqada üçüncü pillədə başa vuraraq UEFA Konfrans Liqasına vəsiqə qazanan "Turan Tovuz" futbol klubu UEFA-nın qərarı ilə 2026/2027 mövsümündə Avropa turnirlərindən kənarlaşdırılıb.
Klubun yaydığı məlumata görə, UEFA İntizam Komitəsi komandanın turnirdə iştirak üçün müəyyən edilmiş meyarlara uyğunluğunu araşdırıb. Araşdırma zamanı AFFA İntizam Komitəsinin 13 dekabr 2019-cu il tarixli qərarı əsas götürülüb.
Həmin qərarla 2019/2020 mövsümündə I Divizionda çıxış edən komandanın yeddi futbolçusuna futbolla bağlı bütün növ fəaliyyətə qadağa qoyulmuşdu. UEFA da bu faktı nəzərə alaraq klubun 2026/2027 mövsümündə UEFA-nın təşkil etdiyi yarışlarda iştirakını məhdudlaşdırıb.
Klub qərarla razılaşmadığını bildirərək, vəsiqəni idman prinsiplərinə uyğun qazandığını vurğulayıb və qərarın dəyişdirilməsi üçün bütün hüquqi addımların atılacağını açıqlayıb. Məsələ ilə bağlı yaxın günlərdə İdman Arbitraj Məhkəməsinə (CAS) müraciət olunacaq.
Bununla yanaşı, klub Avrokuboklara hazırlıq planlarında dəyişiklik olmadığını bildirib. Komanda bu ay bir araya gələcək və təlim-məşq toplanışı üçün Türkiyəyə yollanacaq.
