2026-cı ildə keçiriləcək futbol üzrə dünya çempionatı (DÇ-2026) təkcə 48 komandalı formatı ilə deyil, həm də irqçiliyə qarşı daha sərt qaydalarla tarixə düşə bilər.
Oxu.Az xəbər verir ki, yeni qaydalar qüvvəyə minərsə, hakimlər tribunadan və ya meydandan irqçi hərəkətlərə cavab olaraq matçı dayandıra, komandaları soyunub-geyinmə otağına göndərə və hətta görüşü ləğv edə bilərlər.
İctimaiyyət arasında "Vinisius qaydası" kimi tanınan yeni məhdudiyyətlər son illərdə çoxsaylı irqçi hücumlara məruz qalan braziliyalı ulduz futbolçu Vinisius Juniorun adı ilə bağlıdır.
Yeni qaydalarda ilk addım tribunadan və ya meydançadan irqçi şüarlar, təhqirlər və ya ayrı-seçkilik xarakterli davranışlar aşkar edildikdə, hakimə oyunu müvəqqəti olaraq dayandırmağa imkan verir. Bu müddət ərzində stadionda tamaşaçılara hadisələrin davam edəcəyi təqdirdə daha ciddi tədbirlər görüləcəyi barədə məlumat veriləcək.
İkinci mərhələdə, insidentlər davam edərsə, komandalar müvəqqəti olaraq soyunma otağına göndərilə bilər. Bu o deməkdir ki, matç artıq yalnız qısa bir xəbərdarlıqla davam etməyəcək və təhlükəsizlik qüvvələri də işə cəlb olunacaq.
Üçüncü və ən ağır mərhələdə matç tamamilə ləğv edilə bilər. Belə bir halda müvafiq federasiyalara, məsul şəxslərə idman və maliyyə sanksiyaları tətbiq edilə bilər.
Braziliyalı futbolçunun yaşadığı hadisələr Avropa futbolunda irqçiliklə mübarizə mexanizmlərinin yetərli olub-olmadığı ilə bağlı müzakirələri artırıb.
DÇ-2026-da oyunçuların meydandakı davranışları da yaxından izləniləcək. Xüsusilə mübahisələr zamanı danışarkən ağızlarını bağlayan oyunçulara qarşı daha sərt cəzalar təklif olunur.
