2026-cı ilin aprel ayında Bakıda daşınmaz əmlak bazarının indeksi 101.8 səviyyəsinə yüksəlib. Bu, ötən ilin dekabr ayı ilə müqayisədə 1.8 faiz artım deməkdir.
Azərbaycan Qiymətləndiricilər Palatasından (AQP) verilən məlumata görə, bazar sürətli qiymət artımı mərhələsindən çıxaraq daha sabit, selektiv və fundamental göstəricilərə əsaslanan balanslı inkişaf fazasına keçib.
Yeni tikili mənzil seqmenti 38 faiz payla bazarda əsas hərəkətverici komponent olaraq qalır. Bu seqmentdə indeks 102.6 səviyyəsinə yüksəlib (2.6 faiz artım). Artım əsasən Nərimanov, Nəsimi, Yasamal və Ağ Şəhər kimi mərkəzi və premium zonalarda müşahidə olunub.
Köhnə tikili mənzil seqmenti 27 faiz çəki ilə ikinci ən böyük komponentdir. Burada indeks 101.6 olub (1.6 faiz artım). Qiymət dinamikası nisbətən zəif olsa da, bazar struktur baxımından stabildir.
Həyət evləri seqmenti 16 faiz çəki ilə 102.5 indeks göstəricisi qeydə alınıb (2.5 faiz artım). Torpaq komponenti qiymətlərin əsas formalaşdırıcısıdır.
Torpaq bazarı 10 faiz çəki ilə 102.6 indeksə yüksəlib (2.6 faiz artım). Artan tələb Nərimanov, Xətai, Səbail və Nizami rayonlarında cəmləşib.
Kommersiya daşınmaz əmlak bazarı 8 faiz çəki ilə 100 səviyyəsində sabit qalıb (0 faiz dəyişiklik). Premium kiçik sahəli obyektlərdə yüksək qiymət qorunub, iri sahəli obyektlərdə isə aşağı qiymət diapazonu müşahidə olunur.
Qaraj bazarı 1 faiz çəki ilə 97.6 indeks səviyyəsində qeydə alınıb (2.4 faiz azalma). Bu, aşağı likvidlik və məhdud tələblə əlaqədardır.
Nəticə olaraq, Bakı daşınmaz əmlak bazarı daha yetkin mərhələyə keçib. Qiymət formalaşması fundamental amillər və seqmentlərarası balans əsasında müəyyənləşir. AQP metodologiyası bu struktur dəyişiklikləri yüksək dəqiqliklə əks etdirir.
