Türkiyə Avropa Ödəniş Şurasına (EPC) müraciət edərək Vahid Avro Ödəniş Məkanına (SEPA) qoşulmaq niyyətini bildirib.
Oxu.Az "İnterfaks" agentliyinə istinadən xəbər verir ki, bu barədə Aİ-Türkiyə yüksəksəviyyəli iqtisadi dialoqunun yekun bəyanatında qeyd olunub.
Sənəddə tərəflər Türkiyənin SEPA-da iştirakının sərhədlərarası ödənişləri sürətləndirəcəyi, təhlükəsiz və səmərəli edəcəyi, həmçinin ticarət və investisiyaları artıracağı barədə razılığa gəliblər.
Avropa Ödəniş Şurası (EPC) elektron ödənişlər sahəsində Avropa bank sektorunu əlaqələndirən beynəlxalq qeyri-kommersiya təşkilatıdır. Onun əsas vəzifəsi SEPA standartlarını hazırlamaq, inkişaf etdirmək və tətbiqini uyğunlaşdırmaqdır.
SEPA avro ilə beynəlxalq köçürmələri yerli köçürmələr qədər asan, sürətli və ucuz edən ödəniş sistemidir. Hazırda SEPA-ya Aİ üzvləri də daxil olmaqla 41 dövlət daxildir.
