Yeni qanun layihəsi dövlət mülkiyyətində olan əmlakın (dövlət torpaqları daxil olmaqla) qarşılıqlı razılıq əsasında xüsusi mülkiyyətdə olan əmlakla, o cümlədən torpaq sahələri ilə dəyişdirilməsinin hüquqi əsasını yaradır. Özəlləşdirilməsi qadağan olunan dövlət əmlakı və dövlət ehtiyacları üçün nəzərdə tutulan torpaqlar dəyişdirmənin predmeti ola bilməz.
Bu, Milli Məclisin Aqrar siyasət komitəsinin iclasında müzakirəyə çıxarılan "Torpaq Məcəlləsində, Mülki Məcəllədə və "Qiymətləndirmə fəaliyyəti haqqında" Qanunda dəyişiklik edilməsi barədə" qanun layihəsində əksini tapıb.
Dəyişdirilən əmlakların qiymətləndirilməsi bazar qiyməti nəzərə alınmaqla qiymətləndirici tərəfindən həyata keçiriləcək. Həmçinin, dövlət orqanları və bələdiyyələr qiymətləndirmə fəaliyyəti üzrə sifarişçi statusu əldə edəcəklər.
Qanun qəbul edildikdən sonra dövlət əmlakının xüsusi mülkiyyətlə dəyişdirilməsi qaydası təsdiq ediləcək. Dəyişikliklər torpaq bazarında dövriyyənin aktivləşməsinə, iqtisadi fəallığın yüksəlməsinə və dövlətlə vətəndaşlar arasında çevik əmlak mübadiləsinə şərait yaradacaq.
