Asiya İnfrastruktur İnvestisiya Bankının (AIIB) baş direktoru Xiaohonq Yanq bildirib ki, Orta Dəhlizin tam işlək vəziyyətə gəlməsi üçün növbəti üç ildə təxminən 28 milyard ABŞ dolları həcmində investisiya tələb olunur.
Oxu.Az-a görə, o, Bakıda İslam İnkişaf Bankının İllik Toplantıları çərçivəsində keçirilən “Dayanıqlı nəqliyyat və ticarət üçün Orta Dəhlizin maliyyələşdirilməsi” sessiyasında çıxış edib.
Xiaohonq Yanq qeyd edib ki, daşınma müddəti 30 gündən 18 günə qədər azalsa da, bu göstərici hələ də yüksəkdir. O, əsas prioritetin maliyyələşdirilə bilən infrastruktur layihələrinin həyata keçirilməsi və əməliyyat səmərəliliyinin artırılması olduğunu vurğulayıb.
Onun sözlərinə görə, marşrutun investorlar və yükdaşıyıcılar üçün cəlbedici olması baxımından etibarlılıq və proqnozlaşdırılması vacibdir. AIIB rəsmisi qeyd edib ki, Orta Dəhlizin səmərəli fəaliyyəti üçün avtomobil və dəmir yolları, limanlar, gəmilər, hava limanları, əməliyyat sistemləri və rəqəmsal platformalar vahid şəkildə işləməlidir.
O, həmçinin Azərbaycanda nəqliyyat və logistika sahəsində aparılan modernləşdirmə işlərini yüksək qiymətləndirib.
