Dünyada qlobal proseslərdə Rusiyanın ciddi təsir imkanları yoxdur, daha çox Çinin rolunu görmək mümkündür. Bu fikirləri siyasi şərhçi Xəyal Bəşirov deyib.
Yaxın Şərqdə Çinin rolu görünür: İrana dəstək, siyasi, diplomatik, silah və kəşfiyyat məlumatlarının verilməsi, həmçinin Rusiya-Ukrayna müharibəsində Moskvaya dəstək göstərilir. Çin İranın sanksiya altında olan mallarının ixracına şərait yaradır.
Çin Tayvana öz ərazi bütövlüyü prizmasından yanaşır, ABŞ isə Tayvan üzərində nəzarətdən əl çəkmək niyyətində deyil. Bütün bu məsələlər Pekində müzakirə olunur. Düşünürəm ki, ən əsas məsələ Yaxın Şərq mövzusudur.
Tramp İran kartı əlində olmadan Çinə getməyə məcbur qaldı. Çinlə ABŞ arasında İranla bağlı razılığın əldə olunacağına nikbin yanaşmıram. İranın Çinə müəyyən mesajlar verdiyi görünür. Çin imkanlarından maksimum istifadə edib prosesi uzatmağa çalışacaq.
İran üçün taleyüklü məsələ nüvə məsələsidir. Çin İrana təsir etmək üçün müəyyən kartlardan istifadə edə bilər. Trampın Rusiyaya səfər mesajı da təsadüfi deyil. ABŞ-Çin münasibətləri baxımından bu səfər çox əhəmiyyətlidir və yeni dünya düzəninin formalaşmasına səbəb ola bilər.
