“Hesab edirik ki, soyqırımı 1984-cü ildə bitməyib, sadəcə, fərqli formalarda davam edir”.
Oxu.Az xəbər verir ki, bunu “Panth Punjab” Layihəsinin sədri Çahal Akaşdip Sinqh Bakı Təşəbbüs Qrupunun (BTQ) təşkilatçılığı ilə keçirilən “İyun 1984, Amritsar hadisələri: Hindistanın etnik azlıqlara qarşı transmilli repressiyaları soyqırımı kontekstində” adlı beynəlxalq konfransda jurnalistlərə açıqlamasında deyib.
“Hindistan transmilli repressiyalar vasitəsilə sərhədlərdən kənarda da siqh siyasi fəallarını hədəfə alır. Bu cür hadisələr Kanada və Böyük Britaniyada baş verib. ABŞ-də də belə bir cəhd olmuşdu, lakin xoşbəxtlikdən, ABŞ hökuməti tərəfindən qarşısı alınmışdı.
1984-cü ildən bu günə qədər nə qədər yol qət etdiyimizə baxdıqda görürük ki, siqhlər üçün bu mübarizə hələ də davam edir. Biz hələ də öz hüquqlarımız, azadlığımız və yerimiz uğrunda mübarizə aparırıq”, - deyə Akaşdip vurğulayıb.
