Azərbaycanda dövlət idarəçiliyinin rəqəmsal transformasiyası yeni mərhələyə keçir. Qəbul edilən qərarlar və islahatlar elektron xidmətlərin artırılması ilə məhdudlaşmır. Məqsəd daha çevik, məlumatəsaslı və vətəndaşyönümlü modelə keçid, eyni zamanda innovasiya, süni intellekt və kibertəhlükəsizlik sahələrinin inkişafıdır.
Prezident İlham Əliyevin sədrliyi ilə keçirilən müşavirədə qəbul edilən qərarlar və Rəqəmsal İnkişaf Şurasının yaradılması bu yanaşmanın əsasını qoydu. “Azərbaycan Respublikasında rəqəmsal inkişafın sürətləndirilməsinə dair 2026-28-ci illər üçün Fəaliyyət Planı” qarşıdakı üç il üçün yol xəritəsini müəyyən etdi.
Sənəd dövlət idarəetməsinin optimallaşdırılması, beynəlxalq reytinqlərdə mövqeyin gücləndirilməsi və rəqəmsal iqtisadiyyatın ÜDM-də payının artırılması kimi strateji məqsədləri əhatə edir. Fəaliyyət Planı İnformasiya Təhlükəsizliyi və Kibertəhlükəsizlik Strategiyası, Rəqəmsal İnkişaf Konsepsiyası və Süni İntellekt Strategiyası ilə uyğunlaşdırılıb.
Planın əsas dörd istiqaməti rəqəmsallaşma, innovasiya, süni intellekt və kibertəhlükəsizlikdir. Bu istiqamətlər üçün infrastruktur, hüquqi tənzimləmə, insan kapitalı və idarəetmə mexanizmləri dəstək elementləri kimi müəyyən edilib. Dövlət qurumlarında rəqəmsallaşma təşəbbüslərinə rəhbər müavini səviyyəsində cavabdeh şəxslər təyin olunub.
İyunun 29-da Birinci vitse-prezident Mehriban Əliyevanın sədrliyi ilə Rəqəmsal İnkişaf Şurasının ilk iclası keçirildi. İclasda Fəaliyyət Planının icra vəziyyəti, qanunvericilik islahatları və təhsilin rəqəmsallaşdırılması müzakirə edildi.
Prioritetlər sırasında dövlət idarəçiliyində rəqəmsallaşmanın genişləndirilməsi, süni intellekt texnologiyalarının tətbiqi, kibertəhlükəsizlik sisteminin gücləndirilməsi, innovasiya ekosisteminin inkişafı, investisiyaların və startapların dəstəklənməsi yer alır.
Rəqəmsal İnkişaf və Nəqliyyat Nazirliyinin məlumatına görə, dövlət qurumları üzrə yol xəritələri hazırlanır, Milli Məlumat Hövzəsi yaradılır, dövlət informasiya sistemləri hökumət buluduna köçürülür, “mygov” platforması genişləndirilir, süni intellekt həlləri tətbiq edilir və milli kibertəhlükəsizlik infrastrukturu qurulur.
Hədəflərdən biri dövlət xidmətlərinin vahid platformada cəmlənməsidir. Yeni yanaşma ilə bütün xidmətlər vətəndaşlar üçün “mygov”, sahibkarlar üçün “mygov Biznes” platformalarında təqdim ediləcək.
Proaktiv xidmətlər genişləndirilir: yaşa görə pensiya təyini artıq avtomatik həyata keçirilir. Eyni mexanizm uşaq müavinəti, sənəd xəbərdarlıqları və tibbi müayinə çağırışlarında da tətbiq ediləcək.
2026-28-ci illəri əhatə edən Fəaliyyət Planı rəqəmsallaşma, innovasiya, süni intellekt, kibertəhlükəsizlik və təhsili əhatə edən kompleks transformasiya modelidir. Qarşıdakı dövrdə diqqət hədəflərin icrasına və rəqəmsal inkişafın dövlət idarəçiliyinə inteqrasiyasına yönələcək.
