İyunun 3-də Bakı Təşəbbüs Qrupu (BTQ) tərəfindən Hindistan hökumətinin etnik azlıqlara qarşı repressiv siyasətinə həsr olunmuş beynəlxalq konfrans keçiriləcək.
Konfrans "İyun 1984, Amritsar hadisələri: Hindistanın etnik azlıqlara qarşı transmilli repressiyaları soyqırımı kontekstində" adlanır.
Tədbirdə ilk dəfə olaraq dalit icmasının nümayəndələri də iştirak edəcək. Siqh icmasının Kanada, Böyük Britaniya, Niderland, Almaniya, İsveçrə, Avstraliya və ABŞ-dən nümayəndələri, beynəlxalq təşkilat rəhbərləri, insan hüquqları mütəxəssisləri və repressiya qurbanları da qatılacaq.
Konfransda Hindistan hökumətinin siqh və dalit diasporlarına qarşı transmilli repressiya siyasətinin beynəlxalq gündəmdə saxlanılması, diaspor təşkilatları arasında əməkdaşlığın gücləndirilməsi, ortaq hüquqi müdafiə mexanizmlərinin yaradılması müzakirə olunacaq. 1984-cü il Amritsar hadisələri zamanı siqh icmasına qarşı silahlı hücumlara hüquqi qiymət verilməsi də müzakirə ediləcək.
1984-cü ilin iyununda Hindistan hökuməti Amritsardakı Harmandir Sahib (Qızıl Məbəd) kompleksinə silahlı hücum təşkil etmişdi. Müstəqil mənbələrə görə, hücum nəticəsində səkkiz minə qədər mülki şəxs həyatını itirib.
Qeyd edək ki, BTQ və "Sikh Federation International" tərəfindən hazırlanmış "Sərhədləri aşaraq: Siqh diasporuna qarşı Hindistanın transmilli repressiyası" hesabatında bu faktlar öz əksini tapıb.
İyunun 2-də konfrans qonaqları Atəşgah Məbədi kompleksinə səfər edərək siqh tacirləri və zəvvarlarının dini irsi barədə məlumat alacaqlar.
