Böyük Britaniyanın müdafiə məsələləri üzrə dövlət naziri Lord Vernon Koaker Azərbaycanın müstəqilliyinin 108-ci ildönümünə həsr olunmuş rəsmi qəbulda çıxış edib.
O, Azərbaycanın Britaniya üçün təhlükəsizlik və diplomatik sahədə vacib tərəfdaş olduğunu vurğulayıb.
Lord Koaker ölkələr arasında strateji tərəfdaşlığın artan potensialından danışıb: "Britaniya hökuməti Azərbaycanla münasibətləri strateji tərəfdaşlıq səviyyəsinə yüksəldir. Bu, müdafiə, təhlükəsizlik, ticarət, investisiya, iqtisadi artım, innovasiya və təhsil sahələrində əməkdaşlığı genişləndirəcək."
Nazir qeyri-müəyyən dünyada dost ölkələrin əhəmiyyətini qeyd edib: "Azərbaycan Britaniya üçün təhlükəsizlik və diplomatiyada əsas tərəfdaşdır."
O, Azərbaycanın nailiyyətlərini və Prezident İlham Əliyevin sülh səylərini alqışlayıb. Lord Koaker ötən il dekabrda Azərbaycana səfərini xatırlayaraq Bakının qədim və müasir memarlığına, xalqın qonaqpərvərliyinə heyran qaldığını bildirib.
Lord Koaker həm də Britaniya Lordlar Palatasının üzvüdür. Onun səviyyəsində təmsilçilik ikitərəfli münasibətlərin yüksəldiyini göstərir.
