26 may tarixində Azərbaycan xarici işlər naziri Ceyhun Bayramov Nyu-Yorkda işgüzar səfəri çərçivəsində Çin Xalq Respublikasının xarici işlər naziri Van İ ilə görüş keçirib.
Oxu.Az xəbər verir ki, bu barədə Xarici İşlər Nazirliyi məlumat yayıb.
Görüşdə BMT Təhlükəsizlik Şurasında açıq müzakirələrin təşkilinə görə Çin tərəfinə təşəkkür ifadə olunub. Tərəflər Azərbaycan-Çin münasibətlərinin dinamik inkişafından məmnunluq ifadə ediblər.
2025-ci ildə hərtərəfli strateji tərəfdaşlıq münasibətlərinin təsis edilməsinin əlaqələri möhkəmləndirdiyi bildirilib. 2027-ci ildə diplomatik münasibətlərin 35 illiyi qeyd olunacaq.
Görüşdə ticarət, investisiya, nəqliyyat, enerji, rəqəmsal innovasiyalar və humanitar sahələrdə əməkdaşlıq müzakirə edilib. Orta Dəhliz və Transxəzər Beynəlxalq Nəqliyyat Marşrutunun inkişafı qeyd olunub.
BMT, AQEM, Qoşulmama Hərəkatı kimi platformalarda əməkdaşlıq davam etdiriləcək. Çin nümayəndə heyətinin Ümumdünya Şəhərsalma Forumunda iştirakından məmnunluq ifadə olunub.
