Milli Məclisin deputatı Nəsib Məhəməliyev Oxu.Az-a açıqlamasında bildirib ki, 44 günlük Vətən müharibəsində Azərbaycan Silahlı Qüvvələri beynəlxalq humanitar hüquq normalarına, Cenevrə və Haaqa konvensiyalarına uyğun hərəkət edib.
Deputat qeyd edib ki, Ali Baş Komandan İlham Əliyevin strateji düşüncəsi və qabaqlayıcı tədbirləri mühüm rol oynayıb. Ermənistanın dünya gücləri tərəfindən dəstəklənməsi, beynəlxalq hüququn ikili standartları, islamofobiya və türkfobiya Ermənistanı "məğlubedilməz" imicinə salmışdı.
Müharibədə Gəncə, Tərtər, Naftalan, Mingəçevir kimi şəhərlərin raket atəşinə tutulması dünya tərəfindən susqunluqla qarşılandı. Uşaq, qadın, yaşlı fərq qoyulmadan həlak olanlar oldu. Lakin Azərbaycan təzyiqlərə məruz qaldı.
2023-cü il antiterror əməliyyatlarından sonra Xankəndini tərk edən ermənilərə təhlükəsiz dəhliz verilməsi, su, ərzaq paylanması və reinteqrasiya təklifləri göstərdi ki, humanizm Azərbaycan xalqının genetik kodundadır.
"Erməni faşizminin törətdiyi cinayətlər, vəhşiliklər, soyqırımı aktları insanlığa ləkədir. Prezidentin dəqiq diplomatiyası sayəsində Ermənistanın bütün arqumentləri əllərindən alınıb. Qalib Azərbaycan əsgərinin adı heç bir hərbi cinayətlə hallanmır", - deyə deputat vurğulayıb.
