Fransa 1944-cü il Çikaqo Konvensiyasını pozaraq mülki yük adı altında Ermənistana hərbi yük daşımış ola bilər.
Oxu.Az "Report"a istinadən xəbər verir ki, Fransanın hərbi-nəqliyyat təyyarələrinin Ermənistandakı uçuş məlumatları bu iddianı dəstəkləyir.
"AnewZ" telekanalı Fransa mediasının rəsmi versiyasını və Fransa aviasiyasının İrəvana uçuşlarına dair məlumatları təqdim edib.
Xüsusilə, "Le Figaro" Prezident Makronun İrəvana səfərini strateji tərəfdaşlıq kimi təsvir edir. Müdafiə əməkdaşlığı, o cümlədən Ermənistanın 36 ədəd "Caesar" haubitsasının alınması gündəmdə idi.
Makronun səfəri mayın 5-də başlayıb. ADS-B məlumatlarına görə, mayın 4-də Fransa Hərbi Hava Qüvvələrinə məxsus "Airbus A330-200" təyyarəsi İrəvana gedib. Növbəti gün Parisə qayıdıb.
Bu məlumatlar təyyarənin hərəkətini təsdiqləyir, lakin yükün mahiyyətini açıqlamır.
Bundan əlavə, eyni təyyarə martın 29-dan aprelin 3-dək Yaponiya və Cənubi Koreyada olub. Həmin vaxt müdafiə nazirləri yol xəritəsi imzalayıblar.
Fransanın "A400M" hərbi təyyarəsi mayın 11-də Cənubi Qafqaza doğru hərəkət edib. Yük Gürcüstan üçün qaz balonları, litium batareyaları və kimyəvi maddələr kimi bəyan edilib.
Mayın 28-də Ermənistanda paradda "Caesar" haubitsalarının görünməsi məsələni aktuallaşdırıb.
1944-cü il Çikaqo konvensiyası mülki və hərbi hava gəmiləri üçün fərqli hüquqi rejimlər müəyyən edir. Hərbi yükün fərqli bəyannamə altında daşınması suallar doğurur.
Yük barədə məlumat hələ təsdiqini tapmayıb. İttihamlar sübut olunmayıb, lakin vəziyyət cavab tələb edəcək qədər ciddidir.
