İyunun 17-də Azərbaycan Prezidenti İlham Əliyev ABŞ Konqresinin Nümayəndələr Palatasının üzvü Abraham Hamadeni qəbul edib.
Görüşdə Prezident İlham Əliyev Donald Trampın ikinci dəfə hakimiyyətə gəlişindən sonra Azərbaycan-ABŞ əlaqələrinin uğurla inkişaf etdiyini vurğulayıb.
Dövlət başçısı ABŞ prezidenti ilə şəxsi münasibətlərinin yüksək səviyyədə olduğunu deyib, Birləşmiş Ştatlara səfərlərini və Donald Trampla görüşlərini, həmçinin vitse-prezident Cey Di Vensin ölkəmizə səfərini məmnunluqla xatırlayıb.
“Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası”nın imzalanmasını münasibətlərin genişləndirilməsi baxımından tarixi rol oynadığı qeyd edilib.
Söhbət zamanı Abraham Hamadenin ABŞ Konqresində Azadlığa Dəstək Aktına 907-ci düzəlişin ləğvi ilə bağlı qanun layihəsinə həmmüəllif olmasının əhəmiyyətinə toxunulub.
Prezident İlham Əliyev qonağın səfərinin uğurlu olacağına əminliyini bildirib.
Abraham Hamade Azərbaycanda olmaqdan məmnunluğunu ifadə edərək ölkəmizin coğrafi baxımdan nadir bir məkanda yerləşdiyini deyib. O, həmçinin Azərbaycanda UFC və Formula-1 kimi mötəbər idman yarışlarının keçirildiyini vurğulayıb.
Görüşdə Azərbaycan və ABŞ prezidentlərinin strateji tərəfdaşlığın dərinləşdirilməsi istiqamətində səylərinə toxunulub, hər iki liderin dövlətlərarası münasibətlərin inkişafına böyük önəm verdikləri qeyd olunub.
Donald Trampın Azərbaycan-Ermənistan sülh gündəliyinin irəli aparılmasında rolu xüsusi vurğulanıb, regional nəqliyyat bağlantılarının inkişafı baxımından TRIPP dəhlizinin imkanları müzakirə edilib.
Görüşdə həmçinin Azərbaycanla ABŞ Konqresi arasında dialoqun möhkəmləndirilməsi ilə bağlı fikir mübadiləsi aparılıb, iqtisadi-ticari, sərmayə, enerji, təhlükəsizlik, bağlantılar, texnologiya və digər sahələrdə əməkdaşlığın genişləndirilməsi imkanları dəyərləndirilib.
