Azərbaycan Prezidenti İlham Əliyev mayın 18-də Çin Dövlət Şurasının baş nazirinin müavini Can Quoçini qəbul edib.
Qonaq, ilk növbədə, Çin sədri Si Cinpinin salamlarını dövlətimizin başçısına çatdırıb. Si Cinpin İlham Əliyevi Çinin dostu kimi dəyərləndirir.
Prezident təşəkkür edib, onun da salamlarını Si Cinpinə çatdırmağı xahiş edib. İlham Əliyev Çin sədrinin onu daimi dost adlandırmasını yüksək qiymətləndirdiyini bildirib.
Can Quoçin BMT-nin Ümumdünya Şəhərsalma Forumunun 13-cü Sessiyasında iştirak etməkdən şərəf hissi duyduğunu deyib. O, Azərbaycanın belə bir mötəbər tədbirə ev sahibliyi etməsi münasibətilə Prezidentə təbriklərini çatdırıb.
Dövlət başçısı Çinin yüksəksəviyyəli nümayəndə heyəti ilə təmsil olunmasını Azərbaycana hörmət və dostluq əlaməti kimi qiymətləndirib.
Görüşdə Azərbaycan-Çin münasibətlərinin hərtərəfli strateji tərəfdaşlıq səviyyəsinə çatdığı vurğulanıb. Can Quoçin Azərbaycanın Tayvan məsələsindəki mövqeyinə görə təşəkkür edib, Çinin Azərbaycanın müstəqilliyini, suverenliyini və ərazi bütövlüyünü dəstəklədiyini bildirib.
Prezident İlham Əliyev Çinə dövlət səfərini məmnunluqla xatırlayıb, hərtərəfli strateji tərəfdaşlıq sənədinin önəmini qeyd edib. O, Azərbaycanın separatizmin bütün forma və təzahürlərini pislədiyini, "vahid Çin" siyasətini dəstəklədiyini vurğulayıb.
Söhbət zamanı iqtisadi-ticari, nəqliyyat, hərbi-texniki əməkdaşlıq və digər sahələrdə perspektivlər müzakirə olunub.
