Prezident İlham Əliyev Birinci Türkoloji Qurultayın 100 illik yubileyinə həsr olunmuş Türk Dünyası Həftəsinin iştirakçılarına müraciət ünvanlayıb.
Oxu.Az xəbər verir ki, müraciət mətnini Azərbaycan Prezidentinin Administrasiyasının Humanitar siyasət məsələləri şöbəsinin müdiri Fərəh Əliyeva oxuyub.
Müraciətdə deyilir: "Hörmətli iştirakçılar! Sizi Azərbaycanda Birinci Türkoloji Qurultayın 100 illiyinə həsr olunmuş Türk Dünyası Həftəsinin öz işinə başlaması münasibətilə səmimi-qəlbdən salamlayıram."
İlham Əliyev qeyd edib ki, Birinci Türkoloji Qurultayın 100 illik yubileyinin keçirilməsinə dair təşəbbüs ötən il Qəbələdə irəli sürülüb və bu gün reallaşır.
Prezident vurğulayıb: "Türk Dünyası Həftəsinin Azərbaycanın Türk Dövlətləri Təşkilatına sədrliyi dövrünə təsadüf etməsi xüsusi rəmzi məna daşıyır."
O bildirib ki, Birinci Türkoloji Qurultay türk xalqlarının mədəni inteqrasiyasının məfkurə olaraq təşəkkül tapması baxımından müstəsna əhəmiyyət daşıyır.
Müraciətdə vurğulanıb ki, türk dünyasının ortaq mənəvi dəyərləri - dil, tarix, etnoqrafiya, ədəbiyyat və mədəniyyətin inkişafı ilə bağlı məsələlər, xüsusən vahid ümumtürk əlifbasına keçilməsi diqqət mərkəzində saxlanılıb.
Prezident qeyd edib ki, Azərbaycan XIX əsrdən etibarən milli özünüdərkə zəmin hazırlamış və ilk demokratik dövlət qurmuşdu. Bakı dünya türkologiyasının mötəbər mərkəzlərindən biri kimi tanınırdı.
Müraciətdə təəssüflə qeyd olunub ki, Qurultayda səslənən fikirlərin qarşısı sovet totalitar idarə üsulu tərəfindən süni maneələrlə alınıb. Qurultay nümayəndələrinin əksəriyyəti 1930-cu illərdə repressiyalara məruz qalıb.
İlham Əliyev əmin olduğunu bildirib ki, Türk Dövlətləri Təşkilatının layihələrinin bünövrəsində Birinci Türkoloji Qurultayın mütərəqqi fikirləri dayanır. O, türk dünyasının güclənməsi üçün bütün gücü əsirgəməyəcəklərini vurğulayıb.
Nəhayət, prezident inanıb ki, Türk Dünyası Həftəsi parlaq tarixi-mənəvi irsin yaşadılmasına töhfələr verəcək və yaddaşlarda silinməz iz qoyacaq.
