Beynəlxalq Dəniz Təşkilatının (IMO) baş katibi Arsenio Dominqes, Azov dənizində azərbaycanlı dənizçilərin həlak olması ilə bağlı Azərbaycana başsağlığı verib.
Oxu.Az "Report"a istinadən xəbər verir ki, IMO baş katibinin ölkəmizin Böyük Britaniyadakı səfiri Elin Süleymanova ünvanlanmış məktubunda qeyd olunub: "Dərin hüznlə 2026-cı il iyunun 5-də Azov dənizində 'Natra' və 'Zirkon' yük gəmilərinə hücumlar nəticəsində insanların faciəli şəkildə həlak olduğunu öyrəndim."
Bildirilir ki, hadisə nəticəsində 4 azərbaycanlı dənizçi həlak olub, 4 nəfər isə yaralanıb. Baş katib vurğulayıb: "Beynəlxalq Dəniz Təşkilatının bütün üzvləri, Katiblik və şəxsən öz adımdan Azərbaycan hökumətinə və xalqına dərin hüznlə başsağlığı verirəm."
O, IMO-nun dənizçilərin təhlükəsizliyinin təmin edilməsi və beynəlxalq səylərin dəstəklənməsinə sadiq olduğunu bildirib. "Üzv dövlətlər və dəniz sənayesi arasında əməkdaşlıq belə faciələrin qarşısını almaq üçün vacibdir", - deyə o qeyd edib.
