Səudiyyə Ərəbistanı İranın da daxil olacağı yeni körfəz təhlükəsizlik paktı imzalamağı təklif edir. Bu pakta əsasən, tərəflər bir-birinə hücum etməmək, daxili işlərə qarışmamaq, region dövlətinə qarşı başqa dövlətlərlə birlikdə hərəkət etməmək öhdəliyi götürürlər.
Politoloq Rəşad Bayramov Oxu.Az-a bildirib ki, bu pakt Yaxın Şərqdə son illərin ən mühüm geosiyasi təşəbbüslərindən biridir. Lakin onun ABŞ-nin hərbi bazalarından İrana hücum etməməsi anlamına gəlib-gəlmədiyi sual altındadır.
Bayramov qeyd edir ki, körfəz ölkələrində ABŞ hərbi bazalarının mövcudluğu Vaşinqtonun regional strategiyasının əsas elementidir. Paktda üçüncü dövlətlərə qarşı hücum üçün ərazilərdən istifadəyə icazə verilməməsi maddəsi olarsa, ABŞ-nin manevr imkanları məhdudlaşa bilər.
Reallıqda isə ABŞ hərbi bazaları ikitərəfli müdafiə sazişləri ilə tənzimlənir və bu sazişlər regional təşəbbüslərdən daha güclüdür. Vaşinqton İranı əsas təhlükə kimi görməkdə davam edir və İsrailin təhlükəsizliyi prioritetdir.
Paktın effektivliyi tərəflər arasında etimaddan asılıdır. Yəmən, Livan, İraqda İranın təsiri körfəz monarxiyaları üçün təhlükə olaraq qalır. Gələcəkdə gərginlik yaranarsa, körfəz ölkələri balans siyasəti aparacaq: İranla qarşıdurmadan yayınacaq, ABŞ ilə əməkdaşlığı tam dayandırmayacaq.
