İyunun 8-də İstanbulda Türkiyə, Azərbaycan və Gürcüstan xarici işlər nazirlərinin 10-cu üçtərəfli görüşü keçiriləcək.
Türkiyə XİN mənbələrinə istinadən Anadolu Agentliyi xəbər verir ki, görüşə Türkiyə XİN rəhbəri Hakan Fidan ev sahibliyi edəcək. Görüşdə Azərbaycan XİN rəhbəri Ceyhun Bayramov və Gürcüstan XİN rəhbəri Maka Boçorişvili iştirak edəcək.
Üç ölkə arasında əməkdaşlıq nəzərdən keçiriləcək, növbəti dövr üçün birgə fəaliyyət sahələri müzakirə olunacaq.
Gündəliyin prioritetləri: regional proseslər, xarici siyasət, Cənubi Qafqazda əməkdaşlıq, nəqliyyat, tranzit şəbəkələrinin gücləndirilməsi, enerji təhlükəsizliyi, ticarət və iqtisadi əməkdaşlıqdır.
Nazir Fidan geosiyasi qeyri-müəyyənliklər dövründə Cənubi Qafqazın strateji əhəmiyyətinin artdığını vurğulayacaq. O, qlobal tədarük zəncirlərindəki transformasiya fonunda Orta Dəhlizin artan roluna diqqət çəkəcək. Bakı-Tbilisi-Qars dəmir yolu xətti başda olmaqla regional nəqliyyat layihələrinin gücləndirilməsi prioritetdir.
Birinci görüş 8 iyun 2012-ci ildə Trabzonda, sonuncu isə 15 mart 2024-cü ildə Bakıda keçirilmişdi.
