Heydər Əliyev Fondunun vitse-prezidenti Leyla Əliyeva iyunun 30-da Şəki şəhərindəki Məhəmməd Füzuli adına mədəniyyət və istirahət parkında olub.
Oxu.Az AZƏRTAC-a istinadən xəbər verir ki, Leyla Əliyevaya parkda aparılacaq bərpa və yenidənqurma işləri barədə məlumat verilib.
1951-ci ildə salınan parkda əsaslı təmir işləri nəzərdə tutulur. Parkda vaxtilə fəaliyyət göstərən "Yay teatrı" da bərpa olunacaq. Bu teatr 1800 nəfərlik tamaşaçı yeri ilə məşhur olub və burada Rəşid Behbudov, Zeynəb Xanlarova, Niyazi kimi sənətkarlar çıxış edib.
Parkda Məhəmməd Füzulinin büstü də bərpa olunaraq yerinə qoyulub. Bərpa işlərinin əsas məqsədi freskaları, heykəlləri qorumaq, teatrı canlandırmaq və parkı ailə istirahət məkanına çevirməkdir.
