ABŞ-nin Əsas Amerika Yəhudi Təşkilatlarının Prezidentləri Konfransının sədri Betsi Berns Korn və baş icraçı direktoru Uilyam Darof Azərbaycan Prezidenti İlham Əliyevə təbrik məktubu göndərib.
Məktubda deyilir: "28 May - Müstəqillik Günü münasibətilə Sizə və Azərbaycan xalqına ən səmimi təbriklərimizi çatdırırıq. Azərbaycan Xalq Cümhuriyyətinin 108-ci ildönümündə bu tarixi mərhələnin əhəmiyyətini və onun yaratdığı parlamentli idarəetmə, hüquq bərabərliyi və inklüzivlik irsini dəyərləndiririk. 1918-ci ildə ilk parlamentdə yəhudi nümayəndənin yer alması Azərbaycanda uzunmüddətli birgəyaşayış ənənəsini sübut edir."
Ukraynanın sabiq prezidenti Leonid Kuçma da təbrik məktubu göndərib. O, Azərbaycanın müstəqilliyini itirilmiş əraziləri geri qaytarmaq iradəsinin nümunəsi kimi qiymətləndirib.
Qətər Əmiri Şeyx Təmim bin Həməd Al Tani, Qətər Əmirinin müavini Şeyx Abdullah bin Həməd Al Tani, Bəhreyn vəliəhdi Salman bin Həməd Al Xəlifə, Küveyt vəliəhdi Şeyx Sabah Xalid əl-Hamad əl-Mübarək əl-Sabah və Küveyt Baş naziri Şeyx Əhməd Abdullah əl-Əhməd əl-Sabah da Prezident İlham Əliyevə təbrik ünvanlayıb.
