Zəngəzur dəhlizinin reallaşdırılması istiqamətində mühüm proseslər yaşanmaqdadır. Ermənistandakı seçkilər, İranla ABŞ arasında qarşıdurmanın kəskinləşməsi, Rusiyanın təzyiqləri fonunda "Tramp marşrutu" (TRIPP) ilə bağlı pessimist mövqelər olsa da, reallıq fərqlidir. Əksinə, bölgədə cərəyan edən sürətli geosiyasi proseslər fonunda Zəngəzur dəhlizinə maraq artıb.
Azərbaycan prezidenti İlham Əliyev 31-ci Bakı Enerji Forumunda Zəngəzur dəhlizinin mütləq inşa ediləcəyini vurğulayıb. O, Şərq-Qərb Dəhlizinin digər bir qolu olan bu marşrutun 8 avqust 2025-ci ildə Ağ Evdə imzalanmış sənədə əsasən reallaşacağını bildirib.
Azərbaycan və ABŞ arasında Orta Dəhlizin genişləndirilməsi və Zəngəzur dəhlizinin inkişafı ilə bağlı müzakirələr aparılır. Rəqəmsal inkişaf və nəqliyyat naziri Rəşad Nəbiyevin ABŞ nümayəndə heyəti ilə görüşündə bu məsələlər müzakirə edilib.
ABŞ dövlət katibi Marko Rubio TRIPP layihəsinin Azərbaycan və Ermənistan arasında sülh müqaviləsinin lövbəri olduğunu bildirib. O, layihənin Amerika şirkətlərinə və regional ölkələrə investisiya imkanı yaradacağını vurğulayıb.
Ermənistan və ABŞ arasında strateji tərəfdaşlıq haqqında çərçivə sazişi imzalanıb. Saziş TRIPP çərçivəsində mineralların tədarükünü də əhatə edir.
Rusiyanın iddialarına cavab olaraq Rubio bildirib ki, ABŞ Ermənistanın suverenliyinə qəsd etmir və regionda sülhü dəstəkləyir.
