Bir çox insan yuxu gigiyenasına riayət etsə də, 8 saat yatdıqdan sonra yorğun oyanır. Psixoloq Xose Martin del Plieqo "Hola" nəşrinə müsahibəsində bunun səbəbini açıqlayıb.
Del Plieqonun sözlərinə görə, gecə yuxusundan sonra yorğun oyanmağın əsas səbəbi yuxu zamanı sinir sisteminin aktiv qalmasıdır. Daimi stres altında yaşayan və ya emosional problemlərini idarə edə bilməyən insanlarda orqanizm hətta yatarkən belə özünü təhlükəsiz hiss etmir.
"Orqanizm yüksək hazırlıq vəziyyətində qalır və tam istirahət etmir. Beyin və bədən daim ayıq və ehtiyatlı olur", - deyə o bildirib.
Psixoloq vurğulayıb ki, bu hallarda yuxu müddətini artırmaq və ya qida əlavələri qəbul etmək faydasızdır. Bunun əvəzinə psixotəhsil metodlarından istifadə etmək, şəxsi sərhədləri qorumaq və "yox" deməyi bacarmaq vacibdir.
Xose Martin del Plieqo səhər yorğunluğunu azaltmaq üçün pozitiv insanlarla ünsiyyət, təbiətdə vaxt keçirmək, fiziki aktivlik və informasiya axınından uzaq qalmağı tövsiyə edib.
